ຄະນະນໍາແຂວງອັດຕະປືຢືນຢັນ 9 ເດືອນທ້າຍປີນີ້ເກັບລາຍຮັບເຂົ້າປະມານໄດ້ 54 ຕື້ກີບ

ໃນໂອກາດ ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງອັດຕະປື ລະຫວ່າງວັນທີ 19-20 ຕຸລາ 2017 ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປລາວ ພ້ອມດ້ວຍຄະນະ ໄດ້ພົບປະໂອ້ລົມ ຄະນະພັກ, ຄະນະນຳ, ພະນັກງານຫຼັກແຫຼ່ງ ອ້ອມຂ້າງແຂວງອັດຕະປື ທີ່ຫໍປະຊຸມໃຫຍ່ຂອງແຂວງ. ກ່ອນອື່ນ ທ່ານໄດ້ຮັບຟັງການລາຍງານ ສະພາບການພັດທະນາ ເສດຖະກິດ-ສັງຄົມ ຂອງແຂວງ ຈາກທ່ານ ປອ. ນາມ ວິຍາເກດ ກຳມະການສູນກາງພັກ ເລຂາພັກແຂວງ ເຈົ້າແຂວງອັດຕະປື ເຊິ່ງທ່ານໄດ້ຍົກໃຫ້ເຫັນອັນທີ່ພົ້ນເດັ່ນ ໂດຍສະເພາະໃນໄລຍະຜ່ານມາ ແຂວງອັດຕະປື ຮັກສາໄດ້ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ, ພະນັກງານສຳມະຊິກພັກ ແລະ ປະຊາຊົນບັນດາເຜົ່າ ມີຫຼັກໝັ້ນຊົນຊັ້ຍປະຕິວັດດີ ເປັນເງື່ອນໄຂເອື້ອອຳນວຍໃຫ້ເສດຖະກິດ ໃນປີ 2017ຂະຫຍາຍຕົວ


ຕໍ່ເນື່ອງ ສະເລ່ຍບັນລຸ 8%, ລາຍຮັບຕໍຫົວຄົນບັນລຸໄດ້ 1.980 ໂດລາຕໍ່ຄົນຕໍ່ປີ, ອັດຕາເງິນເຟິ້ຢູ່ໃນລະດັບ 0,45%, ສາມາດດືງດູດການລົງທືນ ຈາກພາກເອກະຊົນພາຍໃນ ແລະ ຕ່າງປະເທດ ໄດ້ 4 ໂຄງການໃຫຍ່ ມູນຄ່າ 325 ຕື້ກີບ, ການລົງທືນສ່ວນໃຫຍ່ແມ່ນສຸມໃສ່ ວຽກງານກະສິກຳ, ການບໍລິການ ແລະ ນິຄົມອຸດສະຫະກຳ ໄລຍະ 9 ເດືອນ 2017 ສາມາດເກັບລາຍຮັບພາຍໃນບັນລຸໄດ້ 54 ຕື້ກີບ ເທົ່າກັບ 40,93 % ຂອງແຜນດັດແກ້ລາຍຮັບຂອງແຂວງໝົດປີ.
ໂອກາດດັ່ງກ່າວ ທ່ານ ປະທານປະເທດ ສປປລ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນງານທີ່ແຂວງຍາດມາໄດ້ ພ້ອມນັ້ນ: ທ່ານກໍ່ໄດ້ໃຫ້ກຽດໂອ້ລົມ ບັນຫາສຳຄັນ ທ່ານໄດ້ເນັ້ນໃຫ້ແຂວງອັດຕະປື ຖືສຳຄັນວຽກງານ ສືກສາອົບຮົມ ການເມືອງແນວຄິດ ໃຫ້ພະນັກງານ, ສຳມາຊິກພັກ ຕະຫຼອດຮອດພໍ່ແມ່ນປະຊາຊົນ ໂດຍສົມທົບແໜ້ນ ກັບການປະຕິບັດລະບຽບກົດໝາຍ ມີການໂຄສະນາໃຫ້ເລິກເຊິ່ງ, ທົ່ວເຖິງ ເພື່ອປູກຝັງຈິດສຳນືກ, ປູກຝັງສະຕິເຄົາກົດໝາຍໃນທົ່ວສັງຄົມ ນອກຈາກນັ້ນ ກໍ່ຕ້ອງເພີ່ມທະວີເອົາໃຈໃສ່ ຕໍ່ວຽກງານປ້ອງກັນຊາດ, ປ້ອງກັນຄວາມສະຫງົບ, ການສືກສາ, ສາທາ ແລະ ສົ່ງເສີມການສ້າງພະນັກງານວິຊາການ, ພະນັກງານສືບທອດ ຮັບປະກັນ ເພດ, ເຜົ່າ ເພື່ອສ້າງກຳລັງແຮງ ໃນການສ້າງສາພັດທະນາແຂວງອັດຕະປື ໃຫ້ມີບາດກ້າວຂະຫຍາຍຕົວຂື້ນໄປເລື້ອຍໆ.