ອອງຊານ ຊູຈີ ເປີດປາກຄັ້ງທຳອິດ ເຜີຍລັດຖະບານ ມຽນມາ ເຮັດວຽກເພື່ອປົກປ້ອງສິດທິ ຂອງຊາວໂລຫິງຢາ.

ນາງ ອອງຊານ ຊູຈີ ທີ່ປືກສາລັດ ຂອງລັດຖະບານ ມຽນມາ ອອກມາສະແດງຄວາມເຫັນຄັ້ງທຳອິດກ່ຽວກັບສະຖານະການຄວາມຮຸນແຮງ ທີ່ເກີດຂື້ນກັບ ຊາວມຸດສະລິມ ໂລຫິງຢາ ໃນລັດ ຢະໄຂ່ ຂອງ ມຽນມາ ນັບຕັ້ງແຕ່ເກີດຄວາມຮຸນແຮງ ຂື້ນຄັ້ງລ່າສຸດເມື່ອ 2 ອາທິດຜ່ານມາ ເຮັດໃຫ້ມີຊາວ ໂລຫິງຢາ ຕ້ອງອົບພະຍົບໜີໄພຄວາມຮຸນແຮງທີ່ເກີດຂື້ນແລ້ວ ກວ່າ 125,000 ຄົນ. ນາງ ອອງຊານ ຊູຈີ ລະບຸວ່າ ລັດຖະບານມຽນມາກຳລັງເຮັດວຽກ ເພື່ອປົກປ້ອງສິດທິຂອງຊາວ ໂລຫິງຢາ ເພາະ ມຽນມາ ຮູ້ດີວ່າ ແມ່ນຫຍັງຄືການບັ່ນທອນສິດທິມະນຸດ ແລະ ການປົກປ້ອງປະຊາທິປະໄຕ ດັ່ງນັ້ນ ມຽນມາຈະເຮັດໃຫ້ແນ່ໃຈວ່າ ທຸກຄົນໃນປະເທດຈະໄດ້ຮັບການປົກປ້ອງ ສິດທິຂອງແຕ່ລະຄົນ ລວມເຖີງສິດທິຕ່າງໆບໍ່ແມ່ນແຕ່ເລື່ອງການເມືອງ ແຕ່ລວມເຖີງການປົກປ້ອງດ້ານສັງຄົມ ແລະ ດ້ານມະນຸດສະທຳ.



ເຊີ່ງຊ່ວງຫຼັງໆມານີ້ ນາງ ອອງຊານ ຊູຈີ ຖືກທົ່ວໂລກໂຈມຕີຢ່າງໜັກ ວ່າບໍ່ອອກມາເວົ້າກ່ຽວກັບເລື່ອງ ທີ່ກອງກຳລັງທະຫານ ມຽນມາ ໄດ້ສັງຫານໝູ່ ຊາວໂລຫິງຢາ ແລະ ການເຮັດໃຫ້ຊາວ ໂລຫິງຢາຕ້ອງອົບພະຍົບຈາກຖີ່ນທີ່ຢູ່ອາໃສ ເພື່ອໜີໄພສົງຄາມ.